نظرتك للكون

هل أنت رباعي الابعاد وعادي زي بقية الناس ولا خماسي الابعاد وعبقري وبيقولوا عليك مجنون؟!
الاختراعات والاكتشافات والكتب والأفلام والأكل الحلو كل ده بسبب البعد الخامس.

في ابتدائي أخدنا ان الدنيا بعدين ( س، ص) أفلام كارتون يعني وفي اعدادي اكتشفنا إنها ثلاثية الابعاد ( س، ص، ع) وفي ثانوي إتفاجئنا إنها أربعة بإضافة البعد الزمني ولكن الحقيقة إن الدنيا خماسية الابعاد.
إيه حكاية البعد الخامس ده بقى؟!

البعد الخامس يا معلم هو الذي أنقذ دماغ أرشميدس من القطع على سيف عشماوي بتاع الامبراطور الروماني وهو إللي عمل من نيوتن والتفاحة أشهر من مادة الميكانيكا إللي وضع أساسها نيوتن وأصبح ذكر اسمه شيئا ضروريا في أي كتاب يحمل لقب علمي , وعشان ما أطولش عليك هو السبب في كل الاختراعات والاكتشافات والكتب والأفلام والأكل الحلو، من الآخر كل إبداع جاء بسبب البعد الخامس إللي هو النظرة المختلفة للأشياء. أي حد عبقري لم يصبح عبقري علشان هو اتولد عبقري، لكنه أصبح عبقري لما شاف البعد الخامس لأي حاجة في الدنيا، وهو ده طريقك للعبقرية، فكتب المدرسة ومن بعدها ملازم الجامعة لاتصنع العبقرية، بل على العكس تصنع الغباء والدهولة وتضع على باب أجدعها خيال شمع أحمر حكومي من النوع الروسي إللي يقفل وما يفتحش تاني، أديسون بتاع المصباح الكهربائي كان بيسقط في المدرسة، بس ده مش سبب عشان تسقط، لأنه كان عبقري اكتشف البعد الخامس في ملف التانجستين وعمل اللمبة يعني هو المسؤول عن النور إللي إحنا فيه دلوقتي، وعشان تبقى زيه لازم تتجرد من أي حاجة تعيق خيالك.

اترك لخيالك العنان ماتفكرش زي الناس العادية حتى لاتصبح مثل الملايين من البشر من دخلوا الدنيا وخرجوا منها دون أن يتركوا ما يتذكرهم العالم به. بص للدنيا من الناحية التانية ـ مش ظهرها يافالح ـ اتفرج على الناس في الشارع ـ مش المزز ـ، استلهم من الدنيا عبقريتك، لاتترك الامور تمر من أمامك دون أن تفحص وتمحص وتنظر؛ فكل المشاهد أمامك تدعوك لتخرج العبقرية منها ليستمتع الناس بها. ليه الارض كروية؟! طب ليه الوقت ما بيرجعش؟! ليه الناس بتصحى بالنهار وبتنام بالليل ليه مش العكس؟!

اتمرد، ارفض، ممكن الناس تكرهك؟، كل العظماء كانوا كده، ممكن الناس تبعد عنك؟ وهمّا يعني كانوا نفعوا مين؟!

اسعى دائما للتفرد، وخليك متأكد إن الناس إللي كرهتك هترجع تحبك، وكل إللي نبذك هيتمنى يتصور معاك، ساعتها يا pop ابقى نفض أو وافق أو حتى أرفض واشخط من حقك ما أنت بقيت عبقري، كل ده بسبب البعد الخامس، بسبب نظرتك الغريبة والثاقبة للأشياء.

لو كنت طالب ماترضاش بالقوانين زي ماهي جادل وناقش، كل القوانين تقريبا كانت غلط واتصححت ماعدا القوانين الإلهية هي القوانين الثابتة.

ارفض الحب التقليدي دور على البعد الخامس في الحب. دور في حبك على حاجة جديدة تخليك واحد تاني غير كل إللي حبوا قبلك، روميو طلع شجرة لجولييت، عنتر جاب النوق الحمر لعبلة، والناس فضلت فاكراهم أما الناس التانية الرباعية الأبعاد فخلاص اتنسوا ومحدش فاكرهم ومحدش هيفتكرهم لأنهم ما فكروش في الدنيا صح

والله العظيم مقالة فى الجوووووووووون يا بودى بجد بجد والله كلام رائع ... ألف شكر يا زعيم ومنتظر حاجات كدة جامدة زى دى ...

يارب كلنا نكون ذوي بعد خامس وسادس وسابع .. إلخ

اتفق طبعا معاك فى موضوع النظرة المختلفة للحياه وعموما الانسان لما بيفكر فى اى حاجة بطريقة مختلفة عن الناس مع الاخذ فى الاعتبار الجدية التامة وعدم الاستهتار مؤكد بيترك بصمة داخل المكان ومش لازم الانسان فعلا ياخد كل حاجة بنرفزة وعصبية لازم فعلا يكبر علشان دماغه ما تفرقعش ويعيش حياه هنيئة لأن من رزقك التكشيرة والضيق رزقك الابتسامه والفرح ا